شهر 11

قصيدة رثاء في المغفور له باذن الله الامير سلطان بن عبدالعزيز ال سعود

لاعادك الله ليلة اربع وعشرين=قبل الصباح وقبل يظهر شعاعه

شهر 11 عام الثنين وثلاثين=اخذ الوداعه من يصون الوداعه

اخذ الذي طيبه رجح بالموازين=اللي مقامه عاليٍ بالرفاعه

اصبحت مدري وش بلا خاطري شين=والعين تنثر دمعها بندفاعه

ناظرت وليا الناس حولي معزين=قلت اخبروني صابت القلب راعه

ويش الخبر قالو خبر ماهو بزين=رح واستمع لاخر خبر فالاذاعه

ويوم اعلنو عاجل وقبل العناوين=طحت ومقامي ماقدرت استطاعه

ثم اصطفق قلبي وخضر الشرايين=والعين يرفض دمعها بنقطاعه

وجريت صوتي وانظر يسار ويمين=واقول ليته واحد امن الجماعه

والله لو ماتو جميع الشدادين=اهون علي من موت راعي الشجاعه

سلطان يامالك قلوب المحبين=اله الكرم يشهد بمدة اذراعه

سلطان يارمز الوفا يا احمر العين=سلطان ياحرٍ شهر بارتفاعه

تبكي لك عيون الضعاف المساكين=ويبكيك من هو جاير الوقت لاعه

ويبكيك من هو يشكي الفقر والدين=من عقب ماهو عايشٍ في مجاعه

ويبكيك يانجمٍ سطع بالميازين=من يقتدي بنورك بليلة ضياعه

ويبكيك شعبٍ حبهم لك من سنين=بقلوبهم مطبوع حبك طباعه

مير العوض بالله وثم السلاطين=لاخوان نوره كل سمعٍ وطاعه

عبدالله اللي لاغدا الحمل حملين=من قو عزمه يرتكي له وزاعه

ونايف شديد الباس سقم المعادين=امن البلد من كل خوف وهلاعه

وسلمان اخو نايف طليق الحجاجين=سيوف المليك ودرع شعب ودفاعه

يالله ياللي بامرك القاسي يلين=تجعل لهم دون المنايا مناعه

مد بعمار اللي حمو راية الدين=خدام بيتك كل يومٍ وساعه

ويالله يافارض صلاة المصلين=يامن لوجهك تخضع الخلق طاعه

انك تجازي سيدي بفعله الزين=واغفر ذنوبه واكتب اله الشفاعه

وعساه من من تاخذ كتابه يمين=وعساه بجنان النعيم ومتاعه

الشاعر/ سامي عايض الشدادي الحارثي

رائعة من روائع شاعرنا الكبير
أبو عايض

كفو والله يا سامي وبيض الله وجهك
كعادتك مبدع ومتمكن
بيض الله وجهك
وكل عام وأنت بألف خير

لكن لا تنسى ديوانك من نقل قصائدك له

رااأئعه جدا جدا



يسلم راسك يالذيب





تحيتي لك

عظم الله أجرنا وأجركم في فقيد أمتنا والله يرحمه

حياك الله ومرحبا فيك

وصح إلسانك مدد بلا عدد ..

صح لسانك يالذيب على هالمرثيه
لكن عندي ملاحظه على صدر البيت الاول بالتحديد على كلمة(اعادك الله)

تقبل مروري واعجابي


احترامي لشخصك

صحت ابدانكم وملاحظتك ياقصر القصيد خطا مطبعي والاصل هي لاعادك



تحياتي للجميع

صح لسانك يابو عايض قصيدة قوية ورائعه
لكن فيه بيت واحد خرب القصيدة بأكملها
اللي هو
والله لو ماتوا جميع الشدادين
أهون علي من موت راعي الشجاعه

هذا خطاء كبير بحق جميع من يحمل أسم شدادي
ومن ضمنهم أبوك وأخوانك وعيال عمك
وماظني أحد يتمنى موت أبوه بدل موت أمير مهما كانت سجايا الأمير الطيبة

شاعر جزل
الله يرحم سلطان
ويحفظ لنا الشعب وحكامه

,
صح لســـــــانك
ابيات رائعه
و
ربي يسعدك
,

صحت ابدانكم جميعا

واخوي الغريق تعرف عاد المبالغه لها دور

ولا انتم غالين عندي اكثر من نفسي ماهو عاد امير

تحياتي لكم