سير الحياة

استعجل الاحلام يادرب الاحلام
لو ان تفكيري سبق صغر سنّي !

سير الحياة يدور بحقول الالغام
من ياخذ احزان المساجين منّي

انام في صدري مثل عبء الايتام
واصحى وكنه يحتضر فيه جنّي

ياكفة الميزان لو حبر الاقلام
يصير لونه بين الالوان بنّي !

ماهي بحزة كل ماقلت قدام
قدام سالف وقتها بالتمنّي !

اعيد ماضيها من العام للعام
ارتاح لو مافيه غير الهبنّي !

طرقي وقدامي طراقي بالاسلام
ماخانني في طعن الاحسان ظنّي‬⁩

محدً يمشيها بكيفه بالارغام
ناقوسها في كل لحظه يدنّي

منشارها جزار بأحوال الاقوام
من عصر ابونا آدم وهي ماتونّي

ماني بجاهلها بطاها والانعام
تضوي براعيها لريع المغنّي !

منها يديني بيض تعزيز واكرام
ماقلت وقت الضيق لإنّي ولإنّي!

عايض الرشيدي

صح السانك
عايض الرشيدي
على هالمقطوعة المباركة
والمعبرة والجزلة
ايها الجزل القادم بقوة.
عساك على القوة
ونحن بانتظار
كل جديد يليق
بشاعر كبير مثلك.
لاهنت ولا هان منطوقك.

ارحب يا ضيفنا العزيز وشاعرنا القدير عايض الرشيدي
طبت وطاب قاقك ومعناك وزان شعرك ومبناك
وبيض الله وجهك على هذه القصيدة وصح لسانك اليوم ودوم

مرحبا بك أخوي الشاعر عايض الرشيدي
نورت منتدانا بهذه القصيدة وهذا الابداع
وصح لسانك والله يعطيك العافية

عووافي ع رائع الابيات
وجزالة الحرووف منك شااعرنا/ عايض الرشيدي

ابدعت وطاب يومك وحياتك بخيروراحة باال