الضيقة ( للشاعر محمد الحارثي )

الضيقه اللي تتعب الحال ياحمود= في حال من مثلي تسوي مواري
لا قلت راحت تقعد ايام وتعود= يطري لها دايم على الحال طاري
ماتشوف جسمي ناحلن كنه العود= اخذت من هم الليال العزاري
على خفوقي ترسل احزاب وجنود=وكنها والدمع ينزل جباري
ليه الليال البيض ترجع كما السود= وليه الزمن يجري علي الجواري
احس حالي بين هالناس مقصود= من هم وقتي مير محدن بداري
لا حانت الضلمى غدا الحال مشدود=وقامت هواجيسي تسج الغداري
ياخوك وسط القلب شعله وبارود=ماشافها حتى طبيب استشاري
وليا غدا العالم هواجيع ورقود= تقنب على حدب الضلوع الضواري
ياوجد حالي وجد من عاش مجحود= يمد كفه والزمان انتحاري
او وجد طفلآ عيشآ في كنف عود= امه كبيره والفقر مايداري
اكبر خوانه راح ماعنه منشود = عشرين عام وهم ابوه اضطراري
واخوه الاخر مسكنه قبر وللحود=وصبح وحيد ودمع عينه عباري
اعرف يابو سلطان مافي الزمن فود = واخذ كلام مجرب الوقت داري
تدري وش اللي يفرق النقص والزود=عزيمة الرجال عند الطواري
ترى العزيمه ضلع راسي وجلمود =بينك وبين الضيم عازل حراري
ومقابل الطيب ترى الطيب مردود= والطيب خصله ماتجي بختياري
وزلة رفيقك خلها مرتع الدود=لا تستمع في ناقلين الهذاري
طبع الزمن ماله ترى حد محدود= يومآ معي واليوم الاخر لغاري

		المشاركة الأصلية بواسطة : محيسن اقتباس
	وزلة رفيقك خلها مرتع الدود=لا تستمع في ناقلين الهذاري طبع الزمن ماله ترى حد محدود= يومآ معي واليوم الاخر لغاري

صح لسانك

قصيدة في قمة الأبداع والروعة

الله يعطيك العافيه ومن أبداع في إبداع

وليا غدا العالم هواجيع ورقود
تقنب على حدب الضلوع الضواري
اخوي محيسن قصيده من العيار الثقيل والثقيل جدا جزله ومن شاعر جزل قريتها اتكثر من ثلاث مرات ولاتكفي الله يبيض وجهك ويعطيك الف عافيه
تقبل تحياتي,,,,,,,

الله الله يا محيسن
قصيدة قمة في الروعة والجمال
وتحمل الكثير من الحكم والمعاني الجزال
صح لسان شاعرنا محمد وأتمنى أن توافينا
بالمزيد من قصائد هذا الشاعر العذب الجميل

مشكورين والشاعر محمد هو نفسه محيسن بس لقب