محتاج عطفك دخيل الله ضميني

مـجـمـوع الأوسـمـة · 11:10 AM

السلام عليكم ورحمة الله وبركاته

" لا قلت يمه حنان الاسم يكفيني "

هاذي قصيدة في الأم أعجبتني وأهديها لأمي

الله يخليها لي ويخليلك أمهاتكم يارب .

محتاج عطفك دخيل الله ضميني = لا تتركيني لدنيا قلبها قاسي
يالغالية بشوق جيتك لا ترديني = جيتك وخطوات رجلي تسبق أنفاسي
محتاج لك حيل ومحتاجك تلميني = من قسوة الوقت ومن تعذيبه القاسي
ابي بعيونك عن أحزانك تشيليني = وأبي بحضنك أفارق هم وسواسي
وابي حنانك وكلماتك تغطيني = من مقدم الرجل لين آخر شعر راسي
وابي أحس بشعورٍ منك يكسيني = عطف ومحبة وحنانٍ دون مقياسي
يمه كبرت وكبر هم الزمن فيني = ومن لوعة الوقت قلبي عايش يقاسي
محتاج حضنك أمانة لا تلوميني = محتاج أعاود طفولة كلها أوناسي
برجّع الوقت وانسى اللي معنيني = يومي صغير وحنانك ماليٍ كاسي
يمه ذكرت الزمان الماضي بعيني = ماضي الطفولة السعيدة وروعة إحساسي
كم كنت أضمك وكم مرة حضنتيني = وكم نام راسي على صدرك وهو ناسي
وكم كنتي تبكين من فكر يبكيني = وكانت عيونك فداك القلب حراسي
وكم كانت مناك دايم بس تشوفيني = أحلى وأنظف بنية بين جلاسي
وياما وياما سهرتي لي تواسيني = لأونست ضيقة وزار الهم مجلاسي
وكم كان حضنك عن الخلان يغنيني = وكم كان عشقك لفرحي ماله قياسي
الله يا ذاك الزمن شقد يحييني = ليته يعود وتعود أفراح وآماسي
ياليتني ماكبرت ولا قسى ليني = وبقيت طفلٍ همومه لعب وأكياسي
يالغالية جيت لك شوق يقديني = كبير لكن بقربك يصغر إحساسي
يمه يايمه أنا بنيتك تحبيني = أدري وربي لكن بقهره ياسي
بحطم الحزن فيني وأقهر سنيني = وبقول للهم : ياقلب العنا ناسي
بنسى عذابي بحضنك لا تهديني = من بعد حضنك يزيد الهم هوجاسي
لا تتركيني وضمي يديك ليديني = لمسة كفوفك تبدد قسوة أتعاسي
أبي أعاند زماني وظلمه الشيني = وأبي بقربك أرده عني الخاسي
ياأعز ناسي وياكل الكون في عيني = ياملهمتني المحبة وصية نوماسي
يفداك عمري وروحي وكل مغليني = ويفداك كلي وأنا من راسي لساسي
ياأغلى غرام رُبَى داخل شراييني = ويا أعذب شعورٍ سكني وياأجمل إحساسي

والسلام عليكم