جاده الجمل والاد شداد

كان فيه اربعه اشخاص من الثبته من عتيبه جالسين فى موقع جاده الجمل وكان بينهم ولد طويل وجبر ومعه جنبيه ويلعب بها ويقول لربعه شوفوا يوم جينا مع الجاده هذا قبل مده الا هذولا الاد شداد جالسين لنا على الجاده وعلى راسهم حسن بن قنا (من البصصه) ولسؤء حظ هذا الشاب انه كان فيه فى هذا الوقت اللى هم جالسين فيه ويقصه لهم القصه كلا من براز بن محيل ومسفر بن نويشى (جد الوالد) وسليمان بن على قريبين منهم ويراقبونهم وماكان معهم سلاح الشدادين وفجاءه قام الولد من بين ربعه وهو يهج ويسند له سند قريب منهم بعد مالاحظ الشدادين والاد شداد يغيرون عليهم والثبيتى يمد الجنبيه ويحذفها من بعيد حذف على سليمان بن على وهو يذبحه وتطيح الجنبيه ويلتقطها الثبيتى مره ثانيه بعد ماذبح سليمان ويرمى بها براز بن محيل وهى تمر من بين رجليه شاقه ثوبه وينخى سليمان من على مسفر بن نويشى لانه كان قريب منه وقال تكفى يامسفر الرجل ذبحنى ومسفر يلقط حصاه قريبه منه وهو يضرب الثبيتى وتصيبه فى راسه مطيره طاسه راس الثبيتى الا هو قاضى ماضى وباقى الثبته يهجون من واقع الجاده وبراز ومسفر ياخذون سليمان بن على رحمه الله عليه ويرجعون للحارثيه.

هذا القصه حسب ماروائها لى والدى اطال الله فى عمره وعندى الكثير لكن حقيقه الوقت مايسعفنى فى كتابه مالدى عن الاد شداد وبطولتهم لكن اتحين الفرصه فى كتابه مايصل الى باذن الله.

اتمنى من اخوى ابن مهرس ان يمر على الموضوع ويعطينى رائه اذا سمع بهذه القصه


تحياتى


ابو تركى

ربعي بني شداد سقم المعادين = عليهم الأفعال ما هي غريبه

بيض الله وجهك يابن العم وما قصرت
ولا هي غريبه على الاد شداد أهل القاله والطاله ماضي وحاضر

وأما الفارس سليمان بن علي بن برينيس الشدادي نعم قيل أنه قتل في إحدى مواجهات الشدادين مع عتيبه وقد تكون هذي هي قصتها بالتفصيل..

ومن الشدادين ذكرت الفارس براز بن محيل بن محصن العواضي الشدادي
وذكرت مسفر بن نويشي
فهل ما ذكرته هو الفارس مسفر بن نويشي بن مسفر الحجري الشدادي
وألا الفارس مسفر بن نويشي بن سعود البصيصي الشدادي

وهذا ما حبيت توضيحه يالغالي وألا القصة تنومس
وبيض الله وجهك يابن العم وسلم لنا على والدك
وأن كان عندك سوالف فلا تبخل علينا
أخوك ابن مهرس

اخوى بن مهرس اشكرك على مرورك وتعليقك الاكثر من رائع

الله يطول فى عمرك ياولد العم ويجعلك ذخر

اما الفارس اللى اقصده هو جدى مسفر بن نويشى بن مسفر الحجرى الشدادى

تقبل تحياتى ياولد العم واتمنى من الله عزوجل ان يساعدينى الوقت فى اتحافكم بما هوجديد عن فرسان الاد شداد اذا استجد عندى ماهو جديد

تحياتى


ابو تركى

يا هلا والله بأخوي أبو تركي

دام عندك كل هذي العلوم وراك تبخل علينا وأنت من زمان معنا

وتعرف إننا بحاجة لمثل هذه القصص ؟؟؟!!!!

من اليوم ورايح ما لك أي عذر يا أبو تركي

ما نبي منك إلا قصة كل أسبوع أو أسبوعين

قصة وحدة بس . وبيض الله وجهك

بيض الله وجهك يابو تركي هذي هي المشاركات

اللي توسع اصدورنا بيض الله وجهك وماقصرت

اخوى السلطان

ابشر بسعدك ياولد العم وصدقنى مااذخر عنكم شى ابدا

لكن وانا اخوك مشغول كثير والا انتم والله تستاهلون الخير كله


تحياتى

ابو عابد ابشر بسعدك

والعلوم اللى تفرح صدرك


تحياتى

أخوي أبو تركي ايش يعني جادة الجمل ...
وياليت تكثر لنا من قصص الأولين والله تعجبني مره
وأن كان تعرف قصة خالد البصيصي اظن اسمه خالد والله ماادري ( أبو كبود ) ياليت تقصها لنا
مشكوووووووور على الموضوع
تحياتي لك...

مشكور اخوي على طرح هالقصه

		المشاركة الأصلية بواسطة : عايشه بعزأبوها اقتباس
	أخوي أبو تركي ايش يعني جادة الجمل ... وياليت تكثر لنا من قصص الأولين والله تعجبني مره وأن كان تعرف قصة خالد البصيصي اظن اسمه خالد والله ماادري ( أبو كبود ) ياليت تقصها لنا مشكوووووووور على الموضوع تحياتي لك...

عزيزتى عايشه بعز ابوها اشكرك على المرور والتعقيب والسوال

جاده الجمل وهو موقع اتوقع انه وادى صغير جهه بنى سعد وهو فى ديار الثبته من عتيبه

اما قصص الاولين فاابشرى ساوفيكم بكل ماهو جديد باذن الله

اما خالد البصيصى الله يرحمه هو جد الوالد لامه يعنى خوال والدى هم البصصه وخاصه الكو بوديه منهم اما لقب خالد ابو كبود طبعا له قصه هذا اللقب اسال الوالد عنه ورايح اطرحه لك هنا باذن الله

دمتى بووووووود عزيزتى


تحياتى

ابو تركى