لا صـار جـدك ماتـرك لــك ملايـيـن

الشاعر سعود جمعان المطيري من الشعراء المبدعين


وقد حصل له موقف مضحك قبل فترة قصيرة
يقول سعود إنه وهو بالمسجد بعد ماسلم الإمام قام شحاذ يشتكي أموره على المصلين
لعلهم يساعدونه وهو يتشكى كان مركز بعيونه على سعود جمعان

قال له سعود هالأبيات:

يا ابن الحلال اللـي تشكـى علينـا =حنّا لنا بوضع على الله مشاكيه
كانـك تحـرى للعـطـا مــن يديـنـا =عزالله إنك عندنا ما أنت لاقيـه
ماهو ردى بس أرثع الوقت فينـا =ماعندنـا ماناكـلـه دون نعطـيـه

ومرة كان سعود جالس بمجلس وكان فيه شيخ يحدث ويقول من ضمن الحديث
إننا بأعظم نعمة بتاريخ البشرية

قال له سعود : ياشيخ أنا عندي مداخلة

قال له الشيخ تفضل

قال سعود هالأبيات:

ياشيخ شخيت الضحـى فـوق ثوبـك =وانته تروغ عن نحور الصواريخ
النعمـة الـلـي بــس ياشـيـخ دوبــك =ماتحسـب أكبـر نعمـة بالتـواريـخ
وإن كـان هــذا بالتـحـدث أسلـوبـك =فعز الله إنك لقطة غليـس ياشيـخ

وزمان كان سعود طالع من المسجد ولقى وحدة رافعة يدها وتشحذ عند الباب
قال لها سعود:

يابنت ياللـي بالمساجـد تطوفيـن =كفـي يدينـك قبـل نأخـذ ريالـك
حـنــا تـرانــا كـلـنـا مستحـقـيـن =ماهو أنتي اللي مستحقة لحالك
لو لا الحيا شفتي وزانك ثلاثيـن =أحد يميـن منـك وأحـدٍ شمالـك
مرفـعـيـن إيديـنـنـا ومتـقـاعـيـن =الموجب إن أحوالنا مثل حالـك

ومرة بعد جا سعود وفتح له حساب وراح بعد كم يوم يبي يشوف كم في رصيده لأنه
مرة مطفر وش طلع له على شاشة الصراف ؟ مع إنه متأكد من رقمه السري

أنـــا لـقـيـت الـبـنـك مــثــل اخـويـايــه =ما يقضـي الحاجـة إلــى جــاه محـتـاج
أمــس الضـحـى مـريـت كـــل زمـلايــه =وكــلٍ عـطـى لــه بالمعـاذيـر منـهـاج
وضنـيـت بـاقـي فــي رصـيـدي بـقـايـه =وحركـت نـاصٍ حـارس البنـك هجـاج
ودقـيـت رقـمـي صـــح مـابــه روايـــه =طلع على الشاشة : لا داعي للإزعاج

وسعود ما عمره دخل البنك لأنه يقول

يـا أهـل الوظايـف قـولـوا الحـمـدلله =على معوشتكم ولـو رزقهـا ضنـك
أنـا وجنـسـي رزقـنـا لــو وصفـنـاه =حوذ الحنك مافيه زودٍ عن الحنـك
ماطـاح قــرشٍ فــي يديـنـا قرشـنـاه =ودايم طفارى الله يجيـرك ويامنـك
الـبـنـك لـــولا لـوحـتـه مـاعـرفـنـاه =من قل ماندخل على موظف البنـك
مـاغـيـر نـقــرا لـوحـتـه ونـتـعــداه =وإن قيل هذا البنك قلنا اتركه عنك
لاوا هـنــيــك يـالـغـنــاوي هـنــيــاه =تـرقـد وحـنــا بـالـدراهـم نـمـونـك
نفـرح إلـى مـن المـعـاش استلمـنـاه =ويـهــج مـنــا قـرشـنـا ويتـزبـنـك
والله يالوتـصـرف ربــع ماصرفـنـاه =ليصيبك السكر مع الضغط والتنـك
ولـولا جهدنـا وجهدنـا اللـي بذلـنـاه =ماتنفـخ ذروبـك وتـمـلأ مخـازنـك
مـيـر المـقـدر مالـنـا غـيـر نـرضـاه =مرزقك منـا وسقمـة أرقابنـا منـك

طبعا والشاعر سعود جمعان المطيري

هو صاحب القصيدة اللي يرددون الناس بيتها الأول دايم

والقصيدة هي :

لا صـار جـدك ماتـرك لــك ملايـيـن =ماهوب لازم تشتـري لـه ضحيـه
قل له ياجـدي جعلـك مـن المناجيـن =والله ماتـسـوى قيـمـة البربـريـه
عقبتنـي للـديـن ومـصـارع البـيـن =ومن زين طبعك كاتبٍ لك وصيه؟
لو أنت ما أخذ لك من الخد حوشين =يوم الأراض بـلاش وسـط العليـه
إن كـان تلقانـي مـن أهـل الدكاكيـن =مطنـطـخٍ هالـحـيـن مـيــة بـمـيـه
لـكــن يـاجــدي ضحـيـتـك بـعـديـن =إن سهـل المـولـى ثمنـهـا علـيـه
حنا بوقتٍ شين وأشين من الشيـن =فيـه الخـوي ماعـاد ياثـق خـويـه

وسلامتكم

جمع اكثر من رائع في وقت الكل يعاني من ازمة ... الاسهم
انت فعلا مذهل ..بس ياخوك ابعد عن المطران .... ما لقيت الاهم تبحث خفاهم ..

عاد هذا اللي صار يالمستحيلة

وصدقيني سعود قال اللي ما قدر أكثر الناس يقوله

يا هلا بحضورك

هههههههههه الله يسلمك ويعافيك أخوي السلطان

أعجبتني قصائد المطيري اللي تعبر عن بعض

السقطات في حياتنا اليومية

حياك الله أخوي الشقاوي

حيا الله اللي يغيب ويسرع الردة

ومشكور لحضورك

تجميع رائع لشاعر تعرفنا على أسلوبه الجيد


شكراً لك

شكرا لك يالسلطان

ما شاء الله عليه فكاهي وقصيده سلس

صح لسانه وتسلم يالغااااااااااااااالي

ناصر مرزوق + الرهاوي

يا هلا والله وألف غلا

تواجدكما زادني شرفاً فأهلاً بكما

عجيب الشاعر جمع بين الفكاهه والصراحة
اسئل الله ان يعين فقراء المسلمين
مااقول الا رهيب يالسلطان

يا هلا والله بأخوي أبو تركي

شرفني حضورك وأسعدني تواجدك