آخر مواعيدي

بني هااااااااااااااااااااااااااااجر

سلّم / على كل الهواجر وبالذات
.............. آل شهوان اللي لها الطيب عاده
قوم(ن) على كل الميادين طالات
.............. تاريخهم معروف .. دون الإشاده
آلهآجري لا جات فالحرب صكّات
.............. وقت المعارك .. مايرخّي شداده
أنتم هل الامجاد / وأهل البطولات
.............. وأنتم هل الوقفات / وأهل الرياده
خلّك من الاوراق وطبع الختومات
.............. أصل القبايل .. دون ختم وشهاده
على ظهور الخيل .. حد الرهيفات
.............. كلن على الميدان .. يجني حصاده
( خزنة ظفر ) للعز والطيب رايات
.............. رجّالهم لا ( شاش ) / حقق مراده
وليا بغيت الحق من ضمن الابيات
.............. هذي حقيقه! دون نقص وزياده :
لاجيتهم في داخلك كوووم ضيقات
.............. نذر(ن) علي تنسى جميع النكاده
خوالي اللي لأجلهم صغت الابيات
.............. من بعد ماجوّي .. صفالي براده
صكّت هواجيسي وجاتك جزيلات
.............. يوم الفخر ناش القصايد ( سعاده )
هلا كلامي .. عن كبار المقامات :
.............. " قبيلة(ن) مخلوقة(ن) / للسياده "
.............. " قبيلة(ن) مخلوقة(ن) / للسياده "
.............. " قبيلة(ن) مخلوقة(ن) / للسياده "

(2)

عزي لحال الطير لاجاك راعيه
............... صقّار قلبه لاهي(ن) مع زهابه

فرّط على طيره ونفّض اياديه
............... من حظه الاقشر نصاه وغدابه

ثم جاك فوق الجيب يدعس ويعطيه
............... يصفق وراه العقم من حر مابه

واكبر بلا يوم ان خابت هقاويه
............... بينه وبين الطير غطت سحابه

ياجعل ربي يعقل الطير ويجييه
............... وتقر عين انسان يطرد سرابه

شاعرك فاضي والحروف ابجديه ..

أبـدا باسـم خـلاّق سبـع السـمـاوات
............. الـخـالـق المـعـبـود .. مـافـيـه زيّــــه
بشكي على المعبود من خافقن مات
............. بعشق الهنـوف اللـي بعـذابـي سطـيّه
ترسـم لـك الغيـره .. بـوجـه البنـيّـات
............. وتخـلّـي الولـهـان .. عـيـنـه شـقـيّـه
ثلـث الجمـال اللـي بهـا ورث جيـنـات
............. ولا الجـمـال الـلــي تـبـقــّى .. بـلـيّـه
جمـالـهـا .. مايـنـوصـف بالـوصـوفـات
............. امـدلـعـه .. مـتـمــرده .. نـرجـسـيّـه
حبيبـتـي .. ملـيـت شـعـر وكـتـابـات
............. مـدري ولكـن فــي قصـيـدي وصـيّـه
خطيـت لـك شعّـري وركـز علـى الآت
............. ياويـل لحـالـي بـيـن هــذي .. وذيّــه
دام المـعـانـي تـاصـلــك والـعـبــارات
............. "النـفـس هــذي مــع وجــودك هنـيّـه"
ذبحـت لأجلـه حـي وأحييت الامـوات
............. لأجـل العيــون اللـي تجـيـب المنـيّـه
ريانـة(ن) تمـشـي .. خطـاهـا ثقـيـلات
............. تتعـب وتجلـس .. بيـن روحـه وجـيّـه
زاحـت بيدهـا .. مـن تـعـلا المنـصـات
............. مزيونـة(ن) تـسـرق مــن الـبـدر ضـيّـه
سبحان معطيهـا .. عيونـن وسيعـات
............. وان كـان ابـنـزل شــي مـاهـو بيـديّـه
شفايفـن مـن تـوت فيـهـا مسـاحـات
............. مـن لــون وردي يـذبـح القـلـب غـيّـه
صفاتـهـا واجــد .. وحـولـي متـاهـات
............. خـايـف ، ولـكـن داخــل القـلـب نـيّـه
ضامـر بهـا خـصـرن بلـيّـا مسـاحـات
............. وردوفـهـا مــن فـقـر خـصــره غـنـيّـه
طبّـت علـى عـرش المزاييـن بـالـذات
............. مستعمـره .. مستقويـه .. عنجهـيّـه
ظنـي بهـا مـاخـاب لاجــات حــزات
............. ابوسـط صـدري تدحـم الضـيـم فـيّـه
علاقتـي ماهـي ب : مثـل العلاقـات !
............. دقــّـه .. وشـوفــه .. والـنـوايـا دنـيّــه
غرامه ابصـدري مـن سنيـن قـد بـات
............. نـذرن عـلـي مانـسـاه والــروح حـيّـه
فـي داخلـي شيّـد صـروح وعـمـارات
............. وياشيـب عينـي كـل صبـح وعشيّـه
قمت اتوجـد وانطـق الحـب بسكـات :
............. لا والله انهـا .. فــي حيـاتـي هـدّيـه
كـل مـا ألـد العيـن .. يـم المسـافـات
............. تسعـة مـيّـة كيـلـوا .. وزدهــا بمـيّـه
لا واعـذاب القلـب مـن نبـض الآهــات
............. يشـوف موتـه شـوف عيـن الضحـيّـه
مشتاق والاشواق مـن ماضي(ن) فـات
............. أضحـك وعينـي مـن دمـوعـي نـديّـه
ندّت على خدي مـن الضيـق دمعـات
............. واكذب عليك أن قلـت نفسـي رضيّـه
هيهـات .. ياشـوق المحبّيـن هيهـات
............. لـو غبـت عنـي .. نـار الاشـواق حيّـه
والله يــا وســط المـعـاذيـر حـســرات
............. أحيـان تكـوي بـيـن الاضــلاع .. كـيّـه
ياعاشقـي .. لاهنـت دقـق بالابـيـات
............. شـاعـرك فـاضـي والحروف ابجـديّـه

عفواً ، ترى ماني من الناس شكّاي
أضحك ولو جرحي نزيفه .. كسرني !!

وش عاد باقي ياحبيبي بـ / دنياي ؟
حتى حبيبي .. ياحبيبي : ( خذلني ) !!

فارس الإبداع الباذخ

صح لسانك مليوووون ولايسدوووون

جزالتك الشعرية رائعة

وحضورك الشعري يمطر عذوبه جميلة

دمت بهذا العطاء وأكثر

		المشاركة الأصلية بواسطة : تــــرف اقتباس
	فارس الإبداع الباذخ صح لسانك مليوووون ولايسدوووون جزالتك الشعرية رائعة وحضورك الشعري يمطر عذوبه جميلة دمت بهذا العطاء وأكثر

شكرا بحجم السماء يا ترفة مطير ..

( الطوقــــــي )

ياهاجسـي عـد الجبـال الشواهـيـق
نبغـى نسيّـر فـوق .. كـل العـروقـي

سجيـت رجلـي ف الخـلا والمعاليـق
تدحـم قصيـدي قبـل نـور الشروقـي

قنّـدت راسـي مـن بهـار .. الابـاريـق
وقامت عيونـي اتخيـل لمـع البروقـي

كشته وعشوه مـع رجالـن مطاليـق
كلـن علـى علـم المراجـل سبوقـي

ولـو ندقـق فـي .. جميـع المخالـيـق
النـار مــن تحـتـي والامـطـار فـوقـي

احــدن يهـمـه راتـبـه .. والصنـاديـق
طبعه .. على حفظ الامانـه سروقـي

واحدن طبوعه مـن طبـوع المطافيـق
قلبه .. على زلات ( ربعه ) شفوقـي

واحدن علومـه ياصحيبـي .. تلافيـق
يكـذب وينصـب دون خـتـم الوثـوقـي

واحـدن يهـايـط بالحـكـي والطرابـيـق
ولا جـات للصمـلات .. قلبـه ذروقــي

واحــدن دروبــه كــل ابـوهـا تزالـيـق
بينـه وبيـن المجـد .. دربــه يعـوقـي

هذي روؤس اقلام مـن غيـر تنسيـق
نبذه بسيطـه عقـب ماطـاح سوقـي

وش حيلتي لاطحت في حزة الضيق
والهم يضرب مـن سطاتـه خفوقـي

سجّيـت بالـي .. والقصايـد طـواريـق
دامي علـى طـرد .. الجزالـه لحوقـي

هلّيـت لـك قيفـان مــن راس ذوّيــق
مـادام يطغـى فــوق الاذواق ذوقــي

مسودّات الجوال ..

(1)

يا ( ابوي ) رجلي ماتهاب المصاعيب
فارس [ واروّض ] بالفعل كل : مهره !!

من راس ساطي جيت ذيبن على ذيب
متغطرس(ن) كان الزمن شان / دهره !!

[ عايش حياتي ] .. متقن(ن) للأساليب
يدور فيني العام ماحسب لـ ( شهره ) !!


(2)

يا [ صاحبي ] لا تشد الحبل / وتحلّه
ماعاد في [ شوفتك ] / شي ٍ يحفزني !!

مبطي وانا اصبر سيوف البعد منسلّه
واضحك وأردد : حبيبي [ مايهددني ]

من قال [ أبكي ] ودمع العين منهلّه
والله [ يكذب ] .. وقلبك : لا يعاتبني !!

ما احب أزعل وطبعي [ يدحم ] الزلّه
هذي حقيقه مادامك صرت / تجلهني !!

قدام حبّك .. بلاد [ القدس ] / محتلّه
والله يلعن [ عربنا ] ومعك [ يلعني ] !!

(3)

ياللي تعذرب في قصيدي .. تولّم !
ماني على ( هرج ) المغابين نقّاد

مانته من [ آل سعود ] يومك تكلّم
ومانته بواحد من رياجيل [ شدّاد ]

يوم ان [ غيري ] بالمواقيف : بلّم
[ مثلي ] على كل المواقيف / معتاد

[ أسوق رجلي ] للطويلات .. سلّم
ولا انت [ ترثع ] ثم تومي / وتنقاد

(4)

تدري وش احسن شيء ؟ [ لا عاد ترجع ]
والله يلعنننننننننننني ليا صرت : مشتاق ..!!

لا صار .. قلبي .. ( للمقفّين ) / " يخضع "
نذر(ن) عليّ لأرررميه من وسط الاعماق ..!!

(5)

حسني مبارك مانت كفون للامجاد
عزي لحالك .. تارد البير ضامي

تركب على الناقه .. ولكنك تنقاد
معذور مثلك دام .. يرخ الخطامي

ياكثثثثثثرهم .. لا قلت للمال عبّاد
وياقللللللهم .. لا قلت هذا عصامي

اكبر قهر .. لا كنت حاكم لك بلاد
حاكم ولكن عند شعبك .. حرامي

ولو نبدل حرفك السين .. بالصاد
عزالله اني .. صادقن في كلامي !!

(6)

جيتك من الرمضا ادوّر على فيّ
ماكنت ادري راس مالك مغازل ..!!

كويتني كيّه .. على خافقي كيّ
واسمع مادام الهم فالقلب نازل ..!!

ماضاق بالي من كلامك ولا شيّ
لكن [ قلبي ] ما يحب المهازل ..!!

يومك تروح لحضن غيري وانا حيّ
ودّعتك الله .. بيننا اليوم عازل ..!!

(7)

ليت العذارى يوم صفّوا طوابير
ماراحت عيوني للانظار صدفه

والله ماعيّنت من عقبهم خيرر
اللي اعرفه يا بشر .. ما اعرفه

في وسطهن وحده تشيخ الغنادير
ياشيب عيني كل ماغض طرفه

اعيونه الثنتين .. سودن مداوير
والشنطه اللي ذايبه فوق كتفه

كل ماتعدلها .. بروس الاضافير
والله يبطي الشعر ماجاب وصفه

يمين ثم يسار ورجوله اتسير
وكل مامشى جسمه يشدّك لردفه

كنها تترجم ( للقصايد ) / تعابير
وكنه يسوق الشخص لاحدّ حتفه

تاكل حلا كل المزايين تبذيرررر
ومن البخل تعطي المزايين نتفه

الزين نصّه يوسفي دون تبرير
والزين الاخر ماخذه كل نصفه

لا يابعد جددده .. وكل النوافير
ولا يابعد قافي ليا خان حرفه !!

(8)

في ذمتي لو اقدر اموت .. لآآآآآآموت
وأترك وراي هموم .. هالناس والكون !!

لا شفت حقد البعض فالقلب .. منحوت
[ ياليت ربي ] .. ماخلق فيني / عيون !!

مساء الخيرات

مشغولة كثير و ضارب الأمبير عندي وواصلة الإتش لكن قلت باخذ طلة سريعة شفت أبياتك ما قدرت امسك نفسي من شكرك يا شاعرنا فارس

فعلا مبدع

لكن الله يهديك تاخرت عن آخر مره نزلت فيها ........لك متابعين يتعطشون لشعرك

تسلم أناملك

دمت بخير

		المشاركة الأصلية بواسطة : هديل الحب اقتباس
	مساء الخيرات مشغولة كثير و ضارب الأمبير عندي وواصلة الإتش لكن قلت باخذ طلة سريعة شفت أبياتك ما قدرت امسك نفسي من شكرك يا شاعرنا فارس فعلا مبدع لكن الله يهديك تاخرت عن آخر مره نزلت فيها ........لك متابعين يتعطشون لشعرك تسلم أناملك دمت بخير

هديل ..

مساءك سعاده و راحة بال
والله اعجز عن شكرك على هذا الكلام والمدح
دمتي لي متابعه .. اتشرف بها