محاورة بين سعود سليمان ومن رؤس بنيوس

مشكور يامحمد على الحظور والبدع الطيب

والقاف المليان .. اشهد أنك شاعر ممتاز

ورصين ... تقبل كامل الود والا عتبار ..

وتصبح على خير .....

بدري يالربع وين رايحين

تو الليل وإلا تبوني ألعب أنا والولهان


بيض الله وجيهكم جميعاً وماقصرتوا

من رؤس بنيوس

مرحبا ترحيب حاتم وترحيـب الخليـل=مرحبا مثل العسل من خلـي انحالهـا
كأنها التمر الحساوي من عذوق النخيل=ودر خلفات على اول صغـار عيالهـا

سعود سليمان

البقا عداد ما أمطر سحاب وسال سيـل=يارجـالٍ فـا لملاقـا تسـر أفعالـهـا
يا مرحب .. سرها الليل ما هوب اي ليل=دق بيبـان المعـارف وفـك أقفالـهـا

من رؤس بنيوس

كلبونا اخوان في منتدى ربع الجميل=السيوف اللي تقص العظام سلالهـا
والزمن غدارياسعود بالطيب يميـل=كل ماقلنا استوت يندفـق فنجالهـا

سعود سليمان

والله يابعض المشاوير مافيها حصيل=ماكسبنـا لارجبهـا ولا شوالـهـا
ماترقينا مع الربع يالشهم الاصيـل=وغيرنا كل الرتب والا سامي نالهـا

من رؤس بنيوس

حدت الطيب على شرب كأس الزنجبيـل=وناس تشرب من عيـون يـزل زلالهـا
ناس في الرمضاء وناس في الظل الظليل=والحضانا بركـت تحـت جوراحمالهـا

سعود سليمان

الجمل يبرك للاثقال يالقـرم ويشيـل=حملـةٍ كـل المفاريـد ماتشتالـهـا
وأنا لو ما أحب سلطان مدين حيل حيل=كان أبا اخلى ذلولي علـى مجدالهـا

من رؤس بنيوس

عيني تشوف المراقيب وتخيل المخيل=وتعشق العليا وهي في عسير جبالها
والسوالف خلها مثل شرب السلسبيل=من عيون الجنة اللي ظليل ظلالهـا

سعود سليمان

السوالف خلهـا ببينـا والله وكيـل=والنفوس حسابها حسب جنس أعمالها
يالله في جنه تحت ظل ممتد وظليل=عند لحظات القيامه وشـر أهوالهـا

من رؤس بنيوس

اذكرالله وشكره في الصباح وفي الاصيل=وكل حسنة في كتابـك بعشـر امثالهـا
ورجل مايدرى على شيمته يحسب هبيل=وديرة اهل الحسـد لاتمتنـي منزالهـا

سعود سليمان

أنت شاعر جيل غطى على شعّارجيل=قوة ارسالك يشوش بروج ارسالهـا
نبع زمزم مايغطه صفـا ولا نثيـل=اشهد أنك عم جزل العلـوم وخالهـا

ماعليكم زود ياهل الجمايل والدليل = وكـل يمنى فـي الـلـقـاء عـزها بشمالها
فالـكـم الطيب والكـيف من بن وهيل = وانت عـارف في المعاني وجبت جزالها

شاعرنا سعود وشاعرنا محمد ما قصرتوا

وبيض الله وجيهكم امتعتونا وعساكم ع القوه دوم

وأن شاء الله هالمحاوره ما تكون الأخيره نبيها تتكرر مره ثانيه

يعطيكم العافيه وصح السنتكم

وتصبحون ع الف خير

الى اللقاء

البرنس والله نبيهم يكملون بس عزلوا

وعادي يا سليطين نلعب انا وانت :clap:

بس خلني اخذ دوره وكورس عند سعود ومحمد واجي العب معاك محاوره

نشكر الشاعرين الكبيرين

سعود سليمان الحارثي

ومحمد سعد الحارثي

على هذه المحاوره الرائعه والشيقه

وعلى تلبيه طلبنا

والله يبيض وجيهكم

وان شالله ماتكون الاخيره

ونشوف محاوراتكم الرائعه

تنور هذا القسم الرائع

كل الشكر لكم وتصبحون على خير


تقبلوا تحياتي الغربي

صح السان الشعار الكرام وماقصرت يا الغربي على المجهود الطيب

البرنس احشر الولهان قبل يا خذ الكورس

هههههههههههههههههههههههه

اخوي الفاضل سعود سليمان
بيض الله وجهك ياعزوتي وتاج راسي
والله اني استفدت منك الكثير من يوم دخلت منتدى الشدادين
وانت شاعر متمكن ومؤدب، في كلامك فائدة وفي صمتك عبرة
الله يكثر من امثالك وانا شاكر لك بعد شكر الله بارك الله فيك
وتقبل تحياتي

الله الله الله
الله الله
الله
طاروق رائع بين الـشـااااعر
رؤس بنيوس وسعود الحارثي