سكة الأعذار طالت والخطا كثر احتماله

مـجـمـوع الأوسـمـة · توقيع : *عمر الحارثي*

سكة الأعذار طالت والخطا كثر احتماله=الشمالي ضاق صدره وانتهى صبر الحجازي

لامتى نقول الخطأ مسموح والدعوى سهالة=لامتى نجامل ونشكر كل مخطي وانتهازي

إيه غلطة واعتبرها مهزلة وأكبر نذالة=كل ما قلنا نتأهل صارت الفرحة تعازي

منتخبنا بالهزايم ضيع لجهده وماله=خيب آمال الجميع وفشل الناس العزازي

كل مخلص للوطن معذور لو هو ضاق باله=وين تطبيل الرئيس وطهبلة مهدي خرازي

من تحدى للرجال ولا وفا عزي لحاله=ومن جهل فن الصقارة خاب من صيد الجوازي

ومن نوى كسب المعالي ما يعرف الاستحالة=يحذر أسباب السقوط ويعتلي روس النوازي

الولاء روح الرياضة والعتاب أسمى رسالة=والشماتة عنصرية نابعة من فكر نازي

والتجاهل للعقول التافهة ما هو جهالة=والتقاطع بالمصالح ما يشابه للتوازي

انتهى دور الكلام وكل موقف له رجاله=صاحب العزم الحقيقي ما يقارن بالمجازي

حالة الدنيا كذا دوراتها مثل المحالة=تنجرح فيها القلوب وتنكسر مثل الزجاجي

منتخبنا لو خذلنا ما لنا خيار بداله=والوطن لو شان جوه ساس فخري واعتزازي.