آخر 10 مشاركات |
مختارات | قال تعالى : { يَوْمَ تَشَقَّقُ الْأَرْضُ عَنْهُمْ سِرَاعاً ذَلِكَ حَشْرٌ عَلَيْنَا يَسِيرٌ } |
|
||||||||||||||||||
ذكريات "المصري والسمك والنصاب
السلام عليكم ورحمة الله وبركاته أتمنى السعاده الأبديه لقلوبكم هاليومين والله ما أدري وش صاير لي على الذكريات ماغير ودي أكتب أي ذكرى والإسبوع هذا منزل ثلاث ذكريات ههههههههههههههههه ونفسي أترك الشعر وأسوي كتاب لذكرياتي يمكن أبيعه وأحصل على كم قرش من وراه يمكن تساعد على الغلا اللي ذابحني واكيد ذابح الناس كلها مثلي المهم في يوم من الأيام كنت بدوره في معهد الإداره بالدمام وفي يوم التخرج وبعد نهاية الحفل اللي إنتهى الساعه الواحده ظهراً وكان يوم حرّ ورطوبه شديده كان فيه غدى على شرف القائد واستعجلت عن الغداء وطلعت ما أخفيكم كنت طاير من الفرحه لدرجة الجنون وكان في بالي أشياء كثيره بسويها ومنها الطلعه للطائف وجيت بسرعة البرق على سيارتي وأمشي بسرعه 160 كم تقريبا وكان على الكورنيش وزحمه وكنت متهور ومجنون بصراحه المهم دخلت دوار على سرعتي وأصادف مصري على سياره سوزوكي ومحمّل سمك هههههههههههههه وانا أكره السمك وأكره ريحته وحتى طاريه المهم وأصدمه وأنا على سرعتي وتنقلب سيارته وينتثر السمك على الرصيف وتروح سيارتي فيها المهم الحمد لله نجوت وماجاني إلا إصابه خفيفه باقي أثرها على يدي اليسرى إلى الآن وبعد الحمد لله نجى المصري أبو سمك ههههههههههههههههه المهم ماهمني وش صار ولازالت فكرة الطلوع للطائف تلعب في قلبي وراسي وجانا المرور والاسعاف ورحنا المستشفى وكانت إصابتي بسيطه وطلعت بعد ساعه تقريباً وخذيت ليموزين ورحت بيت ولد خالتي وفي ذاك اليوم كان ولد خالتي مشتري سياره جديده وتوه مافرح فيها المسكين وقلت هيا وصلني المطار وحاول إني أجلس معه ونتمشى على السياره الجديده ورفضت أبي أروح للطائف مافيها كلام وطلعنا المطار وبالواسطه ومن هنا وهناك ولا فيه حجز وقلت وصلني موقف النقل الجماعي وقعد يتحايل علي ولافيه أمل المهم قال طيب ورجعنا البيت ونشرب القهوه والشاي وقام ورمى علي ّ مفتاح السياره وقال والله لتسافر عليها وطبعاً السياره جديده ويبي لها درايه وتأني في القياده ولازم سرعتها ماتتجاوز الميّه هذا المعروف اذا كانت جديده وأنا مستعجل وخايف من كذا وعشان كذا حاولت أرفض وحلف علي المهم طلعت من الدمام بعد المغرب ولا كنت أحس بشي غير النشاط لكن بعد ماقطعت تقريباً نصف المسافه بين الدمام والرياض حسيت بوجع ووهن شديد وكأن عظامي مكسره وبالقوه وصلت الرياض وأقرب شقق مفروشه وأنام ..... وصحيت الصباح وكأني أحسن شوي ونويت السفرطبعاً أنا عندي عاده أحسها أنا إنها جميله (ما أشوف أحد في حاجه للمساعده إلاّ وأساعده ) المهم وماشي بالطريق وبعد ماقطعت تقريبا مسافة جيدّه وأشوف صاحب سياره على جانب الطريق وقاعد ينادي ويأشر بيده وتجيني الطبيعه وأوقف بجانبه وأنزل وسلامات وأي خدمه قال تكفى يابو الشباب أنا سيارتي مبنشر وأنا مسوي عمليه في فقرات الظهر ولا أقدر أنحني على الكفر وأسوي البنشر قلت أبشر ماطلبت شي وأنا تعبان ومكسّرالمهم وأقوم وأسوي البنشر والولد قاعد مايسوي شي ومشخص ابو الشباب وماغير يدعي لي والله يعطيك العافيه وماقصرت وتسلم ومن هالكلام طبعا وهو قاعد يتكلم ويدعي ويمدحني وانا ما احب المدح أحس إني منصوب علي بس مدري ليه؟؟؟؟؟؟؟؟؟؟؟ المهم خلصت المهمه ومشيت ووصلت الطائف أخيراً ياللسعادة والفرحه والأنس بموت من الوناسه المهم يوم كنت بالطريق إتصل علي ولد عمتي وحكيت له القصه كلها وحلف عليّ إني أول ما أوصل الطائف أجيه على بيته طوالي وفعلاً بعد ماوصلت الطائف رحت على بيته على طول وأول ماجلست قال والله العظيم إن عشاك بالمطبخ وياخي حرام عليك انا مستعجل ومشتاق لأهلي وبطلع لهم المهم ومازلت تعبان شوي ومرهق من السفر وبعد العشا قال لي مايصير تطلع لأهلك وانت كذا ماغير بتخوفهم عليك بس نام عندي الليله وبكره الصباح تروح لهم واقتنعت وناوي النوم خاصه وانا تعبان شوي وبعد ساعه تقريباً جاني وقال فيه حفله وفيها حبيب وابن عياد وش رايك نروح لها واذا حسيت نفسك تعبان نرجع للبيت البيت قريب وقلت أوكي ورحنا للحفله وليتني مارحت !!!!!!!!!!!! بعد ماجلسنا وخذينا شوي شفت شي يقهر؟ الولد اللي اليوم سويت له البنشر وعلى بالي انه مريض وعنده فقرات بالظهر توجعه ومسكين قاعد يلعب قدام الصف الأيمن ويتهزع كأنه خيزرانه ههههههههههههههههههههاي الله يصلحه واحكي لولد عمتي السالفه وينقهر مثلي وقال خل نضربه وقلت لا بروح أحرجه وأجي ورحت وارد السلام عليه ويطيح وجهه وحسيت إني بردت غليلي شوي وحسيت بنشاط بعدها واستاذنت من معزبي وسريت .. تحياتي
التعديل الأخير تم بواسطة كيان إنسانة ; 21 Sep 2012 الساعة 11:28 PM
|
19 Sep 2012, 05:57 PM | [ 2 ] | |||||||
عضوة متميزة
|
رد: ذكريات "المصري والسمك والنصاب
إن كانت القصة طويلة لكن يبقى ما تحمله من معانٍ جميلة ، فجميل ذلك التواصل بين القرابة وكان الله في عون العبد ، ماكان العبد في عون أخيه وقديمًا قيل : اصنع المعروف في أهله ، وفي غير أهله ، وإن لم تجد أهله فأنت من أهله جميل أن يملك المرء القدرة على تسيطر تجاربه سلمت يمناك شاعرنا المبدع وحي الألم |
|||||||
|
||||||||
19 Sep 2012, 09:12 PM | [ 3 ] | ||||||||
شاعر
|
رد: ذكريات "المصري والسمك والنصاب
هلا والله اختنا شمس تقولي لو كانت القصه طويله؟ هل هذا يعني أن اذا كانت القصه طويله تكون مو جميله يعني أو مايشبه ذلك شكرا على المرور تحياتي |
||||||||
19 Sep 2012, 09:43 PM | [ 4 ] | |||||||
أستغفر الله
|
رد: ذكريات "المصري والسمك والنصاب
وحي الالم
ياخوي لاتدقق على الجانب السئ فقط ترى الاخت شمس قالت :- جميل ذلك التواصل بين القرابة وكان الله في عون العبد ، ماكان العبد في عون أخيه وقديمًا قيل : اصنع المعروف في أهله ، وفي غير أهله ، وإن لم تجد أهله فأنت من أهله ويتهزع كأنه خيزرانه حاس ان عمرك 150 سنة ,, ذنب المصري تسلم على هالقصة ياوحي الالم |
|||||||
|
||||||||
19 Sep 2012, 10:05 PM | [ 5 ] | |||||||
عضوة متميزة
|
رد: ذكريات "المصري والسمك والنصاب
الشاعر الراقي وحي الألم ليست طول القصة عيبًا ولكن المتلقي أصبحت تشده القصص والمقالات القصيرة بارك الله فيك |
|||||||
19 Sep 2012, 10:44 PM | [ 6 ] | ||||||||||||||||||||||||||||
شاعر
|
رد: ذكريات "المصري والسمك والنصاب
فايد ياخوي والله ماادري وش تقول انا اعرف وش قالت شمس وسألتها وجاوبتني انت وش فيك مدري وش تقصد ههههههههههههههههه |
||||||||||||||||||||||||||||
20 Sep 2012, 01:23 AM | [ 7 ] | ||||||||
مشرفة المنتديات الأدبية والتعليمية
|
رد: ذكريات "المصري والسمك والنصاب
احس اني قاعدة أشوف مسلسل في رمضان بعد صلاة المغرب خخخخخخ وحي الالم يعطيك ربي العافية تحيااااتي |
||||||||
|
|||||||||
20 Sep 2012, 09:42 PM | [ 8 ] | ||||||||
مؤسس شبكة الشدادين
|
رد: ذكريات "المصري والسمك والنصاب
هلا بك يا أبو علي وما فيه أجمل من سرد القصص والذكريات الله يحييك ولا هنت |
||||||||
|
|||||||||