الفقر خيم في ربوع الجزيره

الفقر خيّم في ربوع الجزيره

جاني خبر عن مجلس فيـــــــه تقرير=من قايد الدوله وحامــــــــي الذخيره
اللي علـــــى الهيجاء مثل سالم الزير=وزيادتن فوقه علــــــــى الدِين غِيره
اللي يقول :الفقر بيديــــــــــــه تحذير=يبعد عــــن الشعـب السعودي زئيره
واحدث صناديــــق الرخاء زين تدبير=وكلمة هل الدخل التغت مــــن مديره
عبدالله اللــــــــي كان في حكم الآمير=واليوم تاج المُلك صــــــــوّر مسيره
يستاهــــــــل العرش المؤزر ولا غير=عبدالله ايحكمـــــــــه ويصبح أسيره
قبله حكــــــــــــم كل العرب بالطوابير=وحبّه سلب قلب الفتـــــــى والغريره
حبن غزا شعبه ومــــــــن دون تنذير=وركّز قواعد مملكتــــــــــــه المثيره
وأعلى المراتب حازهــــا دون تزوير=واللي علـــــى وضح النقا ما يضيره
هذا كلام الحارثـــــــــــي ليل وعصير=ولين آخر الدنيـــــــا وفتش السريره
ويهدّ طيره حرّ وإلا مــــــــــــن الجير=شيهان والكل اتقــــــــــــى شر طيره
ويقولهـــــا الشعب السعودي ولا خير=في منكرن أنكر علـــــى الجود خيره
واعلم يا بو متعب مـــن أبها ليا النير=ولين الشمال اللـــــي رغد به سفيره
إن العوافي دايمـــــــــــه والستر سير=يمشي عليه اللــــــــــــي تمّناه سيره
لكن يلحقنا مــــــــــــــن المال تقصير=والفقر خيّم فــــــــــي ربوع الجزيره
من يوم الاسهــــــم حوّلت قاعة البير=وكلن تساءل واشتعل فيــــــــه حيره
الاسئله واجد ولا فيـــــــــــــــه تبرير=والقرض حّل ولا عرفنـــــــا مصيره
والقسط عنـــــــىّ طرق عبدالله الخير=وابكــــــــى دموعن بالمدامع غزيره
ليه الحسد صـــــــــوّر مآسيه تصوير=واغمد سيوفه فـــــي متون الظهيره
ليه البطانـــــــــــــه ما تصّب التفاسير=وتعلن ليا حرقت سلـــــــوك الظفيره
وليه العيون اللــي على الكرسي تدير=أمست ترى والصبح صارت ضريره
هذي رسالـــــــــــــــه للملك والتعابير=أكثر مـــــن حروف القصيد الخطيره
عساه يفهم قصـــــــة الشعب والضير=اللي شرب كل العرب مــــــن غديره
لنّه ليـــــــــــــا قال الفرج لازم ايصير=ولن الضميــــــــر العدل هذا ضميره
يا ليتني حولــــــــــــــه واعّد المقابير=اللي قبرها الوقت مـــــن جور غيره
ويا ليتني شاعر علــــــى شهرة العَير=والصف يزهمنـــــــي ومشتاق زيره
من شان مطلوبــــــــــي يحّقق وتأثير=حرفي يبان اليا وضح لــــــي هديره
لكن حكم الوقت مغمــــــــــور وآسير=وسمّ الخياط ابعينــــــــــي ابكل ديره
ما هو جهل بالشعر يا سامعـــــي مير=هذي قوانيــــــــــــن السنين الأخيره
اللي غدت مثل السهـــــــوم المسامير=في ظهر من طال الحصــون الكثيره
وختامها ياللي علــــــــى شعبك اتغير=اطرد جيوش الفقــــــــر برّا الجزيره
وافرج لمـــــــن حالت عليه المساعير=بانيابها فـــــــــــــــي كل ديره وديره
وتصبح على خيرن وتمسي على خير=يا قايد الدوله وحامــــــــــي الذخيره

شاعر مغمور

صح لسانك وبيض الله وجهك أخوي الشاعر المغمور

وهلا بك في منتديات الشدادين

الله يعز حكومتنا وينصرها على من عاداها

ويهيئ لها البطانة الصالحة ويكفي شر عيال الحرام

وأصحاب البطون التي لا تشبع

صح لسانك اخوي شاعر مغمور

لآ هنت على القصيدهـ يالنشمي

صح لسانك أخوي الشاعر المغمور

لاهنت على القصيده الأكثر من رائعه

ويامرحبا بك بمنتديات الشدادين

مغمور والا مشهور....قصيدك رائعه والجزل مانشك في جزايله!!!!صح لسانك وننتظر جديدك!!

شكرا على الاطراء
واخص بالذكر السلطان وسيف الشدادين وصويب الوله
وسعود سليمان ابو عبدالعزيز


وانتظروا الجديد شاعر مغمور

صح لسانك ياشاعر المغمور

احتفينا بقصيده جميله لك واكثر من رائعه سابقا والان نحتفي باجمل منها واجزل

بيض الله وجهك

اتحفنا بالمزيد اطال الله في عمرك

صح لسانك اخوي على القصيده الرااائعه

في انتظار كل جديدك القادم

الله يكفينا شر الكوارث ويجيب الخير سلمت وصح لسانك .. !!

شكرا للشدادي وعبدالله الشدادي والمستحيله


على قراءة القصيدة والمتابعه

شاعر مغمور