أغاني زمان أول

هذي من الأهازيج اللي كان يرددونها الأطفال في الامارات


( يقولونها في وقت المطر )

طاحت عليه نفه = قوموا اشترولي دفه
طاح المطر برعوده = كسر حوي سعوده
طاح المطر بيد الله = كسر حوي عبدالله
طاح المطر من فوق = كسر حوي بن طوق

^^^^^^^^^^^^^^^^^^^^^^^^^

عمتي مرت ابويه = الله يسلط عليها
يوم يتها الهديه = دستها في الزويه
تتحسبني طلاّبه = اطلب على البيبان
ما جن ابويه تاجر =بيصوغ لي الذهبان

^^^^^^^^^^^^^^^^^^^^^^^^


( تقال عند تنويم الطفل ) ةتسمى بالمهاواه

يرقد وليدي رقده هنيه=رقدة الغزلان في البريه
يرقد وليدي طيب الله نومه=وعدو وليدى ما هنا بمنام

^^^^^^^^^^^^^^^^^^^^^^^

يا بنية ما دريتي = عن خطار لفوج
قالت لفوني غبشة = على خيول وبوش
مصلين الجمعه =صقر ولد الشيوخ
يالس على الدجيجه =يالس ويعد فلوس
يا الطاسه يا المخبوقه =ما ضمتها الفلوس

اتمنى ان اختياري عجبكم,,

طاح المطر بيد الله=كسر حوي عبـدالله

ههههههههههههههه نفسي اعرف معنهااااا

وش الحوى؟؟؟؟

الحوى..العشب توه طري.. وحوياء المعزى..
بس حلوة الاغاني..

الله يسلم لي هالخشم يا أبو علي

والله ما قصرت

أهازيج زمان كثيرة جداً وأرجو ممن يحفظ منها أي شيئ يضيفه

		المشاركة الأصلية بواسطة : المستحيلة اقتباس
	الحوى..العشب توه طري.. وحوياء المعزى.. بس حلوة الاغاني..

مااعتقد اكيد راح تدخل لونا او ارجوان وتقول لنا المعناااا

مشكوره على تواجدك

أخوي عبدالله

المستحيلة فسرت على حسب المعنى عندنا في السعودية

وهذا اجتهاد منها وما قصرت

وما دام تقول إنك ما تعتقد

أجل انتظر لونا أو أرجوان يجاوبونك

		المشاركة الأصلية بواسطة : السلطان اقتباس
	الله يسلم لي هالخشم يا أبو علي والله ما قصرت أهازيج زمان كثيرة جداً وأرجو ممن يحفظ منها أي شيئ يضيفه

مشكور على تواجدك الراااائع ولاهنت

		المشاركة الأصلية بواسطة : السلطان اقتباس
	أخوي عبدالله المستحيلة فسرت على حسب المعنى عندنا في السعودية وهذا اجتهاد منها وما قصرت وما دام تقول إنك ما تعتقد أجل انتظر لونا أو أرجوان يجاوبونك

وش قالو لك حضري انا معرف كلام البدووو

انا ابي معنهاااا في البيت يوم يقول كسر حوى عبدالله

المطر هو الي يكسر العشب... شف اهل المزارع كيف يغطونه لا نه ما يتحملل الشعف..
طبعا عبدالله صاحب العشب..
ههههههههه

احم احم.. وصلت ارجوان.. الكل يوسع..
ولا اشوف حد يتحجى عاد!!! ترى انا اللي اعرف لوووول...


اوكي اوكي... عندنا نحن كلمة حوي معناها الحوووش الحديقة التابعة للمنزل يعني.. مرات يكون فيها نخل مرات خالية يلعبون فيها الصبيان..
هالاغنية على ما اذكر كنا نغنيها يوم نحن يهال قبل ايام نانسي ووهيبة بنت وهبي..
يعني اذكر الصورة اللي كانت تخطر على بالي يومها ان المطر لما ينزل سور الحوي راح يتهد والنخل راح يخترب ..جذي يعني..
هذا والله تعالى اعلم..

على فكرة بن طوق هذا شخصية مشهورة عندنا.. وانا شفتها..لوووووول



ان شاء الله اكون فدتكم بخبرتي المتواضعة كبدوية من الامارات لووول

يلا نسلم عليكم يالربع